Burt með okurþjóðfélagið, áfram Jóhanna!

Jóhanna Sigurðardóttir var frábær í Silfrinu á sunnudaginn var og lét höggin dynja á bönkunum og átti ekki í vandræðum með að þagga niður í Jónínu Ben svo eitthvað sé nefnt.  Bankaokrið  sem Jóhanna talaði um er hreint óþolandi, vextir og þjónustugjöld með því hæsta sem gerist á byggðu bóli og vaxtamunurinn heimsmet.  Jóhanna er svo sem ekki að segja neitt nýtt í þessu, hún hefur alltaf veri gagnrýnin á bankana, enda alltaf samkvæm sjálfri sér og fylgin sér.

  En það er ekki bara okur í bankakerfinu, heldur á öllum sviðum þjóðfélagsins, matvælaverð er með því hæsta sem gerist, tryggingar fáránlega háar hérlendis og eldsneytisverð með eina hæstu álagningu sem gerist o.s.frv.  Þessi mál hljóta að verða með stærstu kosningamálunum í vor, þau verða að vera það.  Ég efast um að nokkrar vesturlandaþjóðir aðrar en við myndu sætta sig við þetta.

  Í Fréttablaðinu í dag var sagt frá því að þegar Steve Forbes, ritstjóra FORBES eins virtasta viðskiptablaðs í heimi var sagt frá ástandi efnahagsmála hér á landi, vaxtamuninum og okurvöxtunum, þá skellti hann upp úr! Sagði okkur að reka Seðlabankastjórana og taka upp Evru strax!  Þetta segir manni ýmislegt.

Jóhanna vill að skipuð verði þingnefnd til að rannsaka okur á Íslandi og er ég henni þar hjartanlega sammála.  En til þess að það geti gerst þurfum við að fella núverandi ríkisstjórn og koma Samfylkingunni að.  Hún er eini stjórnmálaflokkurinn sem mögulega getur og vill virkilega gera eitthvað í þessum málum.

 

 

Athugasemdir

[Óttarr Makuch, 5.2.2007 kl. 22:51]

Samkvæmt nýjustu könnunum tel ég að menn ættu frekar að veðja á Vinstri Græna þar sem þeir virðast vera á hraðleið inní nýja ríkisstjórn miðað við það fylgi sem þeir eru að mælast með.  Miðað við þetta má Samfylkingin teljast heppinn ef hún fær 14-16% fylgi!  Tel reyndar sumt af því sem haft hefur verið eftir Forbes vera slitið úr samhengi eins og oft virðist vera gert í búðum samfylkingamanna og kvenna.  En auðvitað á að líta á þessa gagnrýni hans frá öllum sjónarhornum, hvort heldur sem menn vilja fara eftir henni eða ekki!

Hvað Jóhönnu snertir þá hefur hún oft margt til síns máls, en gallinn er einfaldlega sá að það hlusta ekki margir á hana!  Nú eru komið embætti sem ber heitið "talsmaður neytenda" og ef þetta eru ekki mál sem eiga heima undir hans verndarvæng þá eiga engin mál heima þar!  Gallinn er bara sá að hann er enn að jafna sig eftir prófkjörið í Framsóknarflokknum, allavega er hann enn SOFANDI!  Það litla sem hann hefur áorkað er opnun nýrrar heimasíðu sem www.tn.is .