Fylgi samfylkingar á uppleið. Tveggja flokka ríkisstjórn án Sjálfstæðisflokksins?

Það var gaman að vakna í morgun við nýja skoðanakönnun Fréttablaðsins, sem sýndi að Samfylkingin hefði stóraukið fylgi sitt, fengi 27,9% og 18 þingmenn.  En merkilegustu niðurstöður þessarar könnunar eru þó þær að skv. henni yrði í fyrsta skipti í sögunni hægt að mynda tveggja flokka ríkisstjórn án atbeina Sjálfstæðisflokksins!  Það yrðu stórtíðindi og gleðileg.  Ég var einmitt að benda á þennan möguleika í bloggi mínu um daginn, eftir að skoðanakönnun Mannlífs gerði ráð fyrir að þessir tveir flokkar fengju samtals 45% fylgi.  En skv. Fréttablaðinu í dag fá þeir 51,6% samtals og 33 þingmenn.

Í mínum huga var  ekki spurning um hvort Samfylkingin næði sér á strik heldur hvenær.  Flokkurinn hefur hafið gagnsókn og unnið heimavinnuna sína einstaklega vel.  Ég held að amenningur sé að átta sig á því að sú ómerkilega gagnrýni sem Samfylkingin hefur orðið fyrir varðandi stefnuleysi og sú gangnrýni að ISG valdi ekki leiðtogahlutverkinu eigi ekki við nein rök að styðjast. 

Mitt fólk í Samfylkingunni hefur verið að láta betur í sér heyra og koma málum okkar betur til skila.   Fagra Ísland, stefna Samfylkingarinnar í náttúruverndarmálum hefur loksins verið að komast til skila til almennsings, sérstaklega eftir að ISG lýsti því yfir afdráttarlaust að fresta yrir öllum frekari stóriðjuframkvæmdum á höfuðborgarsvæðinu næstu ár.  Hún var ekki að segja neitt nýtt eða að breyta stefnunni, þetta hafði löngu komið fram í stefnunni um Fagra Ísland.  Þá hefur Samfylkingin verið mjög beitt í gagnrýni á stjórnvöld út af ,,Byrgis og Breiðavíkurmálum" og tekið þar upp hanska þeirra sem minna mega sín í samfélaginu eins og hennar er von og vísa.

Ég held líka að fólk sé að átta sig betur á því að ef við ætlum virkilega að fella ríkisstjórnina í vor og  breyta um stjórnarstefnu þá verður Samfylkingin að koma sterk út.  Það að Samfylkingin komi sterk út úr kosningunum sem flokkur í kringum 30% er skýlaus krafa um breytingar.

Það er þó of snemt að fagna.  Ég hef áður sagt að ég taki helst ekki mark á skoðanakönnunum frá neinum nema Capasent Gallup, þó Fréttablaðið hafi í sjálfu sér staðið sig ágætlega og ekki verið langt frá úrslitum kosninga.  Svarhlutfall í þessari könnun er hins vegar frekar lágt eða 54,8 % sem minnkar marktækni hennar eitthvað.  En ég er þó viss um að þetta er vísbending um að Samfylkingin er á uppleið.  

 

 

Athugasemdir

[Óttarr Makuch, 11.2.2007 kl. 15:27]

Já þið hafið svei mér haldið fast í stefnuna Fagra Ísland og það sést að stefna ykkar í stóriðjumálum hefur svo sannarlega fengið sinn skerf af heimavinnu, en eitthvað virðist hafa gleymst eða þið gleymt því að að Hafnarfjörður er hluti af höfuðborgarsvæðinu og þar eru Samfylkingarmenn á útopnu við að boða kosti þess að stækka álverið í Straumsvík en það er auðvitað viðaukakaflinn við "fagra Ísland" stefnuna! 

Ég gef lítið út á gagnrýni Samfylkingarinnar á Birgis- og Breiðavíkurmálið enda tel ég að slík mál eigi fólk ekki að nýta sér og flokk sínum til framdráttar á kostnað annara.  Það hefur alveg verið ljóst frá því þessi mál komu upp nú fyrir skömmu að það verður unnið í þeim og það hefði verið.  Reyndar finnst mér að félagsmálaráðherra þarf að svara ákveðinni spurningu með Birgismálið, af hverju var skýrslunni haldið leyndri?  Hver var til að mynda hlutur Hjálmars Árnasonar í því máli, þetta er mál sem fólk vill fá svör við og það fyrr en seinna!

Við höfum alltaf deilt þeirri skoðun að það er best að fagna eftir að talið er upp úr kjörkössunum, svo mikið er víst!

[Óttarr Makuch, 11.2.2007 kl. 15:29]

Smá viðbót við "fagra Ísland" stefnu ykkar, hvað meinar ISG að fresta eigi öllum stóriðjuframkvæmdum á höfuðborgarsvæðinu næstu ár?  Er hún þá að tala um 2 ár eða svona rétt fram yfir kosningar eða er hún að tala um 20 ár eða er hún að segja að frekari stóriðju er ekki að vænta á höfuðborgarsvæðið?  Svar óskast!

[Egill Rúnar Sigurðsson, 11.2.2007 kl. 17:11]

Hvað varðar stækun álverssins í Straumsvík og Samfylkinguna í Hafnafirði þá hefur það verið ákveðið á félagsfundi Samfylkingarinnar þar að mæla hvorki með né á móti stækkun, heldur láta Hafnfirðinga um að ákveða það sjálfa í kosningum.

Hvað Fagra Ísland varðar og frestun stóriðjuframkvæmda á höfuðborgarsvæðinu, þá hefur þetta komið alveg skýrt fram hjá mínu fólki.  Tökum okkur 3-4 ár í að vinna að rammaáætlun um náttúruvernd og höldum að okkur höndum á meðan. 

[Óttarr Makuch, 11.2.2007 kl. 17:29]

Frekar ódýrt!  En síðast þegar ég vissi er bæjarstjórinn í Hafnarfirði Samfylkingarmaður og hann hefur barist bæði leynt og ljóst með STÆKKUN álversins í Straumsvík síðustu vikur og mánuði, það hefur þá líklegast gleymst að boða hann á fundinn, eða hvað?