Hart var tekist á Silfrinu. Samhljómur VG og Sjálfstæðisflokks?

Árni Páll Árnason, frambjóðandi Samfylkingarinnar í Suðvesturkjördæmi fór á kostum í Silfri Egils og gagnrýndi VG harðlega fyrir að taka höndum saman við Sjálfstæðisflokkinn gagnvart því að þrengja möguleika fyrirtækja eins og Straums Burðarás til að gera sín viðskipti upp í evrum.  En með reglugerð sem fjármálaráðherra setti nýverið og VG styður, er gengið lengra í að hefta viðskiptafrelsi að þessu leiti, en í nokkru öðru landi, sem við berum okkur saman við.  Þá höfðu Sjálfstæðisflokkur og VG nýverið komið með sameiginlega ályktum í evrópumálum, sem engum ætti svo sem að koma á óvart þar sem að ekki hefur slitnað á milli þeirra slefið þegar að afstöðu til Evrópusambandsins kemur.

Varðandi ástæður mikillar velgengni VG í skoðanakönnunum, þá benti Árni Páll réttilega á það að Sjálfstæðismenn, allt frá Davíð til dagsins í dag, hafa ekki gert annað en klappa VG eins og kjölturakka og hæla þeim stöðugt fyrir stefnufestu og eiga þar af leiðandi stóran þátt í þessari velgengni þeirra.  Þetta hafa þeir án efa gert til að reyna að eyðileggja möguleika Samfylkingarinnar til þess að verða það mótvægi við Sjálfstæðisflokkinn sem hún hefur fulla burði til að vera og nauðsyn er á í okkar samfélagi.  Ekki er annað að sjá en þeim hafi orðið nokkuð ágengt.  Einnig tel ég ekki ólíklegt að Davíð, sem var framsýnn og slyngur stjórnmálamaður hafi horft fram á það að þegar Framsóknarflokkurinn  yrði ekki nothæfur lengur í stjórnarsamstarf yrði VG kippt inn í staðinn.  Það var í það minnsta augljóst á valdatíma Davíðs að Samfylkingin var eitur í hans beinum og engin teikn á lofti um að það hafi mikið breyst, þó að ég viti um marga óbreytta flokksmenn sem horfa frekar til Samfylkingar um stjórnarmyndun en VG.

Ég held að það væri hollt fyrir almenning og kjósendur að leiða aðeins hugann að því hvort að Sjálfstæðisflokkur og VG séu á leiðinni í ríkisstjórn saman og þá hvernig sú ríkisstjórn yrði.  Ég er þó ekki í neinum vafa um það að margir af hörðustu andstæðingum Sjálfstæðisflokksins er að finna á meðal fylgismanna VG, þ.a. það myndi sjálfsagt ekki verða samþykkt átakalaust.  En hvernig ríkisstjórn yrði þetta?  Ég er mjög smeykur um að þessir flokkar myndu draga fram allt það versta í fari hvors annars og við myndum þurfa að horfa upp á ríkisstjórn hafta, afturhalds á mjög mörgum sviðum.  Hins vegar tel ég að Samfylkingin sem er opin, lýðræðislegur og frjálslyndur jafnaðarmannaflokkur gæti dregið fram það besta í VG og slík stjórn yrði góð, þ.e. ef Samfylkingin fengi að leiða hana.

Athugasemdir

[Jökull (IP-tala skráð) 11.3.2007 kl. 17:25]

ég held að það eina sem Árni Páll náði fram í þessum umræðum var að hann sýndi bersýnilega hve liðsmenn Samfylkingarinnar eru svekktir, reiðir og öfundast út í velgengni flokks sem þeir segjast vilja vinna með í ríkisstjórn. Allveg fáránlegt að fara svona á taugum og opinbera sig svona, það færi betur fyrir Samfylkinguna að vera málefnaleg, ræða sín mál, sína styrkleika og gagnrína xD frekar en að VG... Eitt af því fyrsta sem maður lærir í sölumensku er að ganga ekki hart fram í að gagnrína samkeppnisaðila heldur leggja áherslu á með rökum hversu miklu mun betri kostur það er fyrir viðskiptavininn að eiga viðskipti við þig. Þessi sannindi er án efa hægt að heimfæra upp á pólitík og kostningabaráttu... ég held því miður að það sé fátt annað sem S nær fram, með því að bera á torg hversu erfið S mun verða í samstarfi í ríkisstjórn undir forsæti VG, sé enn minna fylgi og aðstoð til óákveðna um að gera upp hug sinn og kjósa ríkisstjórn sem virðist get unnið saman... og þá er ég ekki bara að vísa til núverandi ríkisstjórnarsamstarfs. 

[Egill Rúnar Sigurðsson, 11.3.2007 kl. 18:26]

Mig grunaði að þessi pistill minn mynda fara eitthvað fyrir brjóstið á þér félagi (Jökull). Ég held að það sé ekki rétt að hann eða Samfylkingin séu að fara á taugum. Það sem "pirrar" Árna ofl.hins vergar er það að VG skuli vera farnir að taka afstöðu með Sjálfstæðisflokknum í æ ríkara mæli, eins og gagnvart því að setja fyrirtækjum þessar skorður, varðandi evruna og eindreigna andstöðu við Evrópusambandið. Hins vegar eiga auðvitað Samfylking og VG mesta samleið í þeim málum sem brenna heitast á almenningi, eins og náttúruvernd og endureisn velferðarkerfisins, þá tel ég að þessir flokkar geti náð ásættanlegri lendingu í sjávarútvegsmálum ofl. Punkurinn minn var einfaldlega sá að benda á það möguleika að VG ætlar hugsanlega ekki að nýta þetta tækifæri og skilja Samfylkinguna eftir í stjórnarandstöðu áfram. Ég held að það sé ekki það sem þorri fylgismanna VG vill og myndu hugsa sig tvisvar um að kjósa flokkinn ef þeir teldu að hann ætlaði í stjórn með Sjálfstæðisflokknum.

[Jökull (IP-tala skráð) 11.3.2007 kl. 18:43]

það er nú bara svo að VG er og hefur verið með sömu skoðun í ES og Evru málum frá upphafi... það er ekkert nýtt þ.a. tómt mál að vera að tala um þetta eins og það sé eitthvað nýtt sem er að koma upp núna.

En ég ætla að vona að við getum verið sammála um að það kunni ekki góðri lukku að stýra að ganga svona hart fram í gagnríni á VG... sérstaklega ekki fyrir Samfylkinguna sjálfa ef þeir hafa hug á að komast úr stjórnarandstöðu.

[Egill Rúnar Sigurðsson, 11.3.2007 kl. 20:06]

Meðalvegurinn er vandrataður. Get verið sammála því að þessir flokkar mega ekki slást um of ef þeim er alvara með að starfa saman eftir kosningar, sem ég vona virkilega. Ég hræðist hins vegar mest að erfitt verði að fara í stjórn með frjálslyndum.