Höfum frítt í strætó! Tilraunarinnar virði.

Ég fagna þessari tillögu Samfylkingarinnar í borgarráði, að lækka staðgreiðslugjald í strætó niður í 100 kr. til að sporna gegn svifriksmengun.

Ég hefði reyndar viljað ganga lengra og hafa ókeypis í strætó í a.m.k. 1 ár til reynslu.  Ég efast ekki um að farþegafjöldi myndi stóraukast, eins og kom á daginn í Þórshöfn í Færeyjum þar sen þessi tilraun var gerð.  Mengun myndi stórminnka við þessar aðgerðir.

Lagt til að fargjald í strætó lækki í 100 krónur í mars

Netlögregla?! Ég held ekki!

 Steingrímur J. Sigfússon, formaður Vinstri grænna, lýsti þeirri skoðun sinni í Silfri Egils að hann vildi koma á fót sérstakri netlögreglu, til þess að hindra aðgang að klámi og annarri óáran, á netinu. 

  Þessi hugmynd Steingríms er ein sú vitlausasta sem ég hef heyrt í stjórnmálum síðan að Guðrún Helgadóttir vildi koma á fót ríkisdagblaði!  Þá tel ég hana skylda fáránlegri hugmynd Björns Bjarnasonar um íslenska leyniþjónustu.

  Ef þetta ætti að vera mögulegt þyrftum við að setja upp sérstakar netsíur og værum við þá eina ríkið í heiminum sem gerðum slíkt fyrir utan Kína!  Ég held að mjög fáir vilji lifa við slíka forræðishyggju og lögregluríki eins og Steingrímur og áður Björn Bjarna eru að boða.  Þessar hugmyndir eru farnar að minna mig óþægilega mikið á mynd Georges Orwell 1984 um samfélag stóra bróðurs.

Rússnensk kosning hjá VG!

  Steingrímur J. og Katrín voru kosin rússneskri kosningu sem formaður og varaformaður hjá VG.  Atkvæðagreiðslan var framkvæmd með lófaklappi.  Hefði þó verið skemmtilegra að sjá fylgi þeirra í prósentutölum í leynilegri kosningu. 

  Steingrímur er öflugur stjórnmálamaður, mikill ræðuskörungur og fylginn sér.  Í rauninni sé ég engann annann sem gæti keppt við hann um formannsembættið innan VG.  Þá leyfi mér að efast mjög um það að VG væru á því flugi sem þeir eru í dag ef ekki væri fyrir Steingrím J.  Í mínum huga er hann Vinstri hreyfingin grænt framboð.

  Það er svo umhusunarvert að ef VG fær það fylgi sem þeir eru að mælast með þá komast margir gamlir allaballar inn á þing.  Er þá ekki komið ,,nýtt alþýðubandalag", skipað innsta kjarna gamla ,,flokkseigendafélagsins".  í mínum huga er margt af þessu fólki þjóðernissinnaðir íhaldsmenn sem hafa lítinn áhuga á framförum, nýsköpun og sókn atvinnulífsins. Ég efast hins vegar ekki um það að þeir munu standa sig vel og gera margt gott í velferðar og umhverfismálum komist þeir í stjórn.

Steingrímur endurkjörinn formaður og Katrín varaformaður VG

Framleiðni mun aukast með styttingu vinnutíma.

   Ég fagna þessum hugmyndum Samfylkingarinnar um styttingu vinnuvikunar.  Því eins og kom fram hjá Ingibjörgu Sólrúnu vinnum við íslendingar þriðja lengsta vinnudaginn af OECD ríkjum.  Framleiðnin er hins vegar langtum minni hér en annars staðar, þar erum við í 19. sæti.

  Ég er ekki í vafa um það að stytting vinnuvikunar muni skila sér í aukinni framleiðni, þar sem vinnuálagið dregur án efa úr henni.  Annars þarf hugsanaháttur okkar að breytast þegar að kemur að þessum málum.  Allt of margir einblína um og of á það hveru mikið þeir geta unnið í því skyni að hafa sem mest laun.  Menn eiga frekar að gera kröfu um góð og mannsæmandi laun fyrir fulla dagvinnu. 

Samfylkingin vill taka upp viðræður um að stytta vinnutíma í áföngum

Kiddi ,,sleggja" í 2. sætið!

  Jæja þá er það orðið ljóst að Kristinn H. Gunnarsson, eða Kiddi ,,sleggja" kemur til með að skipa 2. sætið á lista Frjálslynda flokksins í Norðvestur kjördæmi.

  Ég get ekki sagt að þetta hafi beinlínis komið á óvart, bjóst frekar við þessu.  Það hefði þó að mínu mati verið meiri áræðni fólgin í því fyrir Kristinn að taka 1. sætið í öðru hvoru Reykjavíkurkjördæmana, en líklega hefur hann ekki lagt í þann slag og metið möguleika sína meiri í 2. sæti í höfuðvígi flokksins (NV kjördæmi). Eins kann að vera að hann vilji með þessu móti forðast útlendingaumræðu flokksins.

  Ég er nokkuð viss um að þetta styrkir Frjálslynda flokkin í NV kjördæmi, þar sem Kristinn hefur heilmikið persónufylgi.  Hins vegar er ég ekki viss um að hann verði lengi vinsæll í flokknum, þar sem hann þrífst greinilega illa í flokkum yfirleitt.  Ég hefið t.a.m. ekki viljað fá hann í Samfylkinguna! 

Kristinn í 2. sæti hjá Frjálslyndum í Norðvesturkjördæmi

Forsetinn gerði rétt að neita að skrifa undir lögin!

  Í viðtali við Egil Helgason í silfrinu kvaðst Forseti Íslands, Ólafur Ragnar Grímsson, hafa gert rétt að neita að skrifa undir fjölmiðlalögin svokölluðu.  Atburðarrásin eftir synjunina hefði líka sýnt það að svo hefði verið.

 Þarna er ég fullkomlega sammála Forsetanum.  Komið hefur á daginn að þær hrakspár sem hafðar voru uppi um að ein fjölmiðlasamsteypa (365) væri á góðri leið með að sölsa undir sig alla fjölmiðlun í landinu reyndist svo sannarlega ekki á rökum reyst.  Í raun hefur samkeppnin og fjölbreytileikinn í íslenskum fjölmiðlaheimi aldrei verið meiri.  Til hefur orðið nýtt fríblað, Blaðið, sem hefur náð góðri útbreyðslu, og enn eitt blaðið, Kronikan, var einnig að koma út svo eitthvað sé nefnt.

  Þá var ég hjartanlega sammála Forsetanum um að það hafi verið miður að málið skyldi ekki fara í þjóðaratkvæðagreiðslu eins og stjórnarskráin gerir ráð fyrir.  Hefði verið eðlilegra mál að sjá hver vilji þjóðarinnar væri eða hefði verið í þessu stórmáli og í samræmi við stjórnarskrána.  Ég tel reyndar að Stjórnvöld hafi ekki þorað með málið í þjóðaratkvæðagreiðslu að ótta við að bíða auðmýkjandi ,,ósigur".  Enda sýndu skoðanakannanir á þessum tíma að 80% þjóðarinnar voru á móti fjölmiðlafrumvarpinu og 70% landsmanna vildu að málið færi í þjóðaratkvæðagreiðslu.

   Öll framkoma ríkisstjórnarinnar í þessu máli var að mínu mati gerræðisleg og full ástæða til að rifja hana rækilega upp í komandi kosningabaráttu!  Hvað synjunarvald forseta áhrærir, þá er ég ekki í vafa um að mikill meirihluti þjóðarinnar vill hafa synjunarvaldið áfram og telur að það eigi að vera á valdi forseta að beita því.  Úrtöluraddir ýmissa ,,lagaspekinga"  um að stjórnarskráin segi eitthvað annað eru að mínu mati fáránlegar og komu fyrst upp í seinni tíð.

Forseti kveðst hafa gert rétt með því að hafna lögum

Þá vitum við það! Þorgerður með stækkun en Lúðvík óákveðinn.

Þá vitum við það.  Þorgerður stendur með stóriðjunni eins og hún og hennar flokkur eru vön.  Hún má að sjálfsögðu hafa sína skoðun á því eins og allir aðrir (ég er á móti stækkun), en persónulega finnst mér það ekki við hæfi að menntamálaráðherra opinberi skoðun sína í þessu máli.  Hún er jú ráðherra menntamála og rætt hefur verið um möguleika á að þróa þekkingariðnað á svæðinu ef stækkun verður felld.

Ég hélt hins vegar að andstæðingar Samfylkingarinnar, hefðu rétt fyrir sér að því leiti að Lúðvík Geirsson bæjarstjóri í Hafnafirði styddi stækkun með ráðum og dáð, en á því eru þeir búnir að vera hamra margir hverjir.  Það er greinilega ekki rétt þar sem hann hefur ekki tekið ákvörðun enn hvort hann greiði atkvæði með eða á móti stækkun.

Menntamálaráðherra styður stækkun álversins í Straumsvík

Loksins eitthvað vitrænt frá framsóknarmönnum.

Valgerður Sverrisdóttir utanríkisráðherra og  skv. síðustu skoðanakönnun Fréttablaðsins annar af tveimur þingmönnum Framsóknarflokksins eftir kosningar, hefur lýst því yfir að hún vilji að Framsókn myndi áfram ríkisstjórn með Sjálfstæðisflokknum eftir kosningar í vor nái hún meirihluta. Hinn þingmaðurinn yrði líklega Guðni Ágústsson, mjög samstæður þingflokkur eða hitt þó heldur!

Ég hreinlega skil ekki hvað framsóknarmenn hafa verið að hugsa, eða hvort þeir hugsi yfirleitt.  Flokkurinn er að deyja drottni sínum og þeir skilja ekkert hvers vegna, berja hausnum við steininn.  Ég er hins vegar ekki í nokkrum vafa um ástæðuna, ,,vinstra fylgið" eða félagshyggjufylgið sem að flokkurinn hafði ávallt þó nokkuð af er farið! Það kemur ekki aftur nema Framsókn hætti að verða undir hælnum á Sjálfstæðisflokknum  og fari að ,,brosa til vinstri".  Veit svo sem ekki hvort það myndi hjálpa þeim neitt úr þessu og ekki mitt markmið að reyna að bjarga þeim!  Það er auðvitað miklu meira að hjá flokknum en þetta, en þetta er höfuðástæðan fyrir slöku gengi þeirra.

Framsóknarmenn í Skagafirði vilja s.s. ekki berja höfðinu við steininn legur og fara að viðurkenna staðreyndir.  Þeir sjá þá einu von fyrir sinn flokk að viðurkenna að flokkurinn er orðinn b deild í Sjálfstæðisflokknum.  Eða eins og ég hef áður sagt í bloggi mínu, ef þú kýst Framsókn þá færðu Sjálfstæðisflokk með og öfugt 2 fyrir 1!

Vilja ekki að Framsóknarflokkur myndi áfram stjórn með Sjálfstæðisflokki

Fylgi samfylkingar á uppleið. Tveggja flokka ríkisstjórn án Sjálfstæðisflokksins?

Það var gaman að vakna í morgun við nýja skoðanakönnun Fréttablaðsins, sem sýndi að Samfylkingin hefði stóraukið fylgi sitt, fengi 27,9% og 18 þingmenn.  En merkilegustu niðurstöður þessarar könnunar eru þó þær að skv. henni yrði í fyrsta skipti í sögunni hægt að mynda tveggja flokka ríkisstjórn án atbeina Sjálfstæðisflokksins!  Það yrðu stórtíðindi og gleðileg.  Ég var einmitt að benda á þennan möguleika í bloggi mínu um daginn, eftir að skoðanakönnun Mannlífs gerði ráð fyrir að þessir tveir flokkar fengju samtals 45% fylgi.  En skv. Fréttablaðinu í dag fá þeir 51,6% samtals og 33 þingmenn.

Í mínum huga var  ekki spurning um hvort Samfylkingin næði sér á strik heldur hvenær.  Flokkurinn hefur hafið gagnsókn og unnið heimavinnuna sína einstaklega vel.  Ég held að amenningur sé að átta sig á því að sú ómerkilega gagnrýni sem Samfylkingin hefur orðið fyrir varðandi stefnuleysi og sú gangnrýni að ISG valdi ekki leiðtogahlutverkinu eigi ekki við nein rök að styðjast. 

Mitt fólk í Samfylkingunni hefur verið að láta betur í sér heyra og koma málum okkar betur til skila.   Fagra Ísland, stefna Samfylkingarinnar í náttúruverndarmálum hefur loksins verið að komast til skila til almennsings, sérstaklega eftir að ISG lýsti því yfir afdráttarlaust að fresta yrir öllum frekari stóriðjuframkvæmdum á höfuðborgarsvæðinu næstu ár.  Hún var ekki að segja neitt nýtt eða að breyta stefnunni, þetta hafði löngu komið fram í stefnunni um Fagra Ísland.  Þá hefur Samfylkingin verið mjög beitt í gagnrýni á stjórnvöld út af ,,Byrgis og Breiðavíkurmálum" og tekið þar upp hanska þeirra sem minna mega sín í samfélaginu eins og hennar er von og vísa.

Ég held líka að fólk sé að átta sig betur á því að ef við ætlum virkilega að fella ríkisstjórnina í vor og  breyta um stjórnarstefnu þá verður Samfylkingin að koma sterk út.  Það að Samfylkingin komi sterk út úr kosningunum sem flokkur í kringum 30% er skýlaus krafa um breytingar.

Það er þó of snemt að fagna.  Ég hef áður sagt að ég taki helst ekki mark á skoðanakönnunum frá neinum nema Capasent Gallup, þó Fréttablaðið hafi í sjálfu sér staðið sig ágætlega og ekki verið langt frá úrslitum kosninga.  Svarhlutfall í þessari könnun er hins vegar frekar lágt eða 54,8 % sem minnkar marktækni hennar eitthvað.  En ég er þó viss um að þetta er vísbending um að Samfylkingin er á uppleið.  

 

 

Konur sem stjórnmálaleiðtogar. Hindrun í vegi?

Það er ótrúlegt en satt að enn þann dag í dag á 21. öldinni skulum við ennþá eiga erfitt með að sætta okkur við konur sem pólitíska leiðtoga.  Þær konur sem sækjast fast eftir því og þær sem ná þeim áfanga að verða forystumenn sinna flokka, svo sem Ingibjörg Sólrún Gísladóttir hér heima, Hillary Clinton í bandaríkjunum og Segolene Royal í Frakklandi svo einhverjar séu nefndar eru gagnrýndar á annan hátt en karlmenn í þessum stöðum.  Þær eru sagðar Gribbur, kaldar og hranalegar (Royal í Frakklandi) og þar fram eftir götunum.  Þá er eins og þær megi ekki láta kveða of mikið að sér, vera ,,of harðar" eða ,,of beinskeyttar" þá eru þær rakkaðar niður. 

Ég efast t.d. stórlega um það að ef að karlmaður hefði flutt Borgarnesræðurnar frægu fyrir síðustu þingkosningar hefðu þær ekki valdið jafn miklu fjaðrafoki og raunin varð.  Þá fara ótrúlega margir út í mjög svo ómálefnalega umræðu þegar kvennleiðtogar eru annars vegar, mér dettur ekki einu sinni í hug að setja það á prent sem pólitískir andstæðingar hafa kallað Ingibjörgu Sólrúnu til þess að koma höggi á hana. 

Það er eftirtektarvert að oft er eins og konur nái bara ,,visst langt" en ekki alla leið. í fyrstaskipti í sögunni á kona möguleika á því að verða kosin forseti bandaríkjanna og í Frakklandi er það einnig raunhæfur möguleiki að Segolene Royal verði forseti.  Nú þegar er þó kona Kanslari í Þýskalandi.  Ef þær Hillary og Segolene ná þessum áfanga gæti það orðið til þess að brjóta þessar,,ósýnilegu" hindranir kvenna niður.  Þá væri nú gaman að því ef að við íslendingar bærum gæfu til þess að velja konu í stól forsætisráðherra í fyrsta sinn