Burt með okurþjóðfélagið, áfram Jóhanna!

Jóhanna Sigurðardóttir var frábær í Silfrinu á sunnudaginn var og lét höggin dynja á bönkunum og átti ekki í vandræðum með að þagga niður í Jónínu Ben svo eitthvað sé nefnt.  Bankaokrið  sem Jóhanna talaði um er hreint óþolandi, vextir og þjónustugjöld með því hæsta sem gerist á byggðu bóli og vaxtamunurinn heimsmet.  Jóhanna er svo sem ekki að segja neitt nýtt í þessu, hún hefur alltaf veri gagnrýnin á bankana, enda alltaf samkvæm sjálfri sér og fylgin sér.

  En það er ekki bara okur í bankakerfinu, heldur á öllum sviðum þjóðfélagsins, matvælaverð er með því hæsta sem gerist, tryggingar fáránlega háar hérlendis og eldsneytisverð með eina hæstu álagningu sem gerist o.s.frv.  Þessi mál hljóta að verða með stærstu kosningamálunum í vor, þau verða að vera það.  Ég efast um að nokkrar vesturlandaþjóðir aðrar en við myndu sætta sig við þetta.

  Í Fréttablaðinu í dag var sagt frá því að þegar Steve Forbes, ritstjóra FORBES eins virtasta viðskiptablaðs í heimi var sagt frá ástandi efnahagsmála hér á landi, vaxtamuninum og okurvöxtunum, þá skellti hann upp úr! Sagði okkur að reka Seðlabankastjórana og taka upp Evru strax!  Þetta segir manni ýmislegt.

Jóhanna vill að skipuð verði þingnefnd til að rannsaka okur á Íslandi og er ég henni þar hjartanlega sammála.  En til þess að það geti gerst þurfum við að fella núverandi ríkisstjórn og koma Samfylkingunni að.  Hún er eini stjórnmálaflokkurinn sem mögulega getur og vill virkilega gera eitthvað í þessum málum.

 

 

Mildunardómur Hæstaréttar yfir barnaníðingi!

Ég á ekki orð til að lýsa hneykslan minni yfir dómi Hæstaréttar frá sl. föstudegi þar sem hann mildar dóm héraðsdóms yfir Ólafi Barða Kristjánssyni fyrir kynferðisafbrot gegn stúlkubörnum, allt niður í þriggja ára gömlum!  Ég styð því fullkomlega Hrafn Jökulsson ásamt um 200 manns öðrum sem hafa sent mótmæli til réttarins vegna þessa.  Þá fagna ég einnig forsíðu Morgunblaðsins sem birti myndir af dómurunum og lýsti hneykslan sinni á dómnum. 

Vilji almennings er skýr, hann vill þyngja þessa dóma! Vilji löggjafans er einnig greinilega í þyngingarátt, þó að mun betur megi gera.  Refsiramminn er til staðar, því eins og segir í mótmælabréfi Hrafns: ,,Þið hefðuð getað dæmt hann í 4 ára fangelsi, samkvæmt 2. málsgrein 202. greinar almennra hegningarlaga.  Fyrsta málsgreinin gerir ráð fyrir allt að 12 ára fangelsi..".

Dómurinn var kveðinn upp af 5 karldómurum.  Spurning hvort að kvenndómari hefði dæmt öðruvísi, ég hallast að því að að trúa að svo hefði verið.  Við verðum að þyngja dóma yfir kynferðisafbrotamönnum!  

Eldmessa Jóns Baldvins og Samfylkingin

   Jón Baldvin Hannibalsson var í Silfri Egils sl. sunnudag og fór mikinn.  Þar flutti hann mikla ,,eldmessu” um stjórnmála og efnahagsástandið hér á landi.  Jón fór hreinlega á kostum og hef ég ekki í annan tíma heyrt jafn hnitmiðaða gagnrýni og greiningu á stöðu mála.  

  Í sem stystu máli fjallaði Jón um okurþjóðfélagið Ísland, sem hann kallaði hina nýju birtingarmynd hins nýríka samfélags.  Hann fjallaði um verðtryggingarkrónuna, sem hann og Guðmundur Ólafsson hagfræðingur og háskólaprófessor eru sammála um að sé í raun ónýtur gjaldmiðill.  Þá talaði hann um okurvextina og ofurtollana, sem eru nú kapítali út af fyrir sig. Þá væri ,,vinnuþrælkunin” hér á landi orðin fáránleg eða 53 st. á viku að meðaltali! Hvers konar lífsgæði eru það spurði Jón. ,,Við erum að verða skrípamynd af bandarískum kapítalisma” sagði Jón og þar með að fjarlægjast Evrópu hvað þetta varðar. Þá talaði Jón um vaxtamunin hér á landi, sem áðurnefndur Guðmundur Ólafsson og Þorvaldur Gylfason prófessor hafa gert úttekt á og komist að þeirri niðurstöðu að vaxtamunurinn hér á landi sé hreint heimsmet og hvergi annars staðar neitt í líkingu við það sem hér gerist.   

  Jón Baldvin fullyrti að ríkisstjórn Sjálfstæðis og Framsóknarflokks hefðu gert stórkostleg hagstjórnarmistök og í raun hefði engin hagstjórn átt sér stað hér síðustu ár og vitnaði í því sambandi í einn helsta ,,gúrú” viðreisnarstjórnarinnar gömlu, Jónas Haralds.  Jón rökstuddi mál sitt með því að benda á þrjú atriði sem þarna skiptu mestu: 

1.   Ríksstjórnin réðst í gífurlegar stóriðjuframkvæmdir (álframkvæmdir) og virkjanir sem       fjármagnaðar voru með erlendu fé.

2.   Ríkisstjórnin ákvað á sama tíma að veita fólki 90% lán til íbúðarkaupa, sem hleypti           byggingamarkaðnum í algert uppnám.

3.   Slaki í ríkisfjámálum.   

  Þetta þrennt var gert í hagkerfi sem var við fulla framleiðslugetu og fulla atvinnu!  Innflutt vinnuafl bjargaði hins vegar því sem bjargað var, án þess hefði allt farið í kalda kol.   

  Afleiðing þessarra hagstjórnarmistaka urðu síðan þær að krónan styrktist óeðlilega mikið en veiktist síðan þegar erlendar fjármálastofnanir áttuðu sig á því að þetta byggðist allt á erlendu fjármagni og verðbólgan fór af stað í kjölfarið og er að kosta venjulegar fjölskyldur í landinu gífulega mikið, sem þær sitja margar hverjar uppi með í 30 ár eða svo í formi íbúðarlána.  Staðreyndirnar eru síðan þær að við sitjum uppi sem skuldugasta þjóðfélagið og heimilin skuldugustu heimili í heimi.   

 Endureisnin að mati Jóns á að felast í skynsamlegri hagstjórn, aðhaldssamri stórn efnahagsmála í gegnum ríkisfjármálin og frestun á frekari stóriðjuframkvæmdum en þetta tvennt fer saman. Alþingiskosningarnar í vor eiga að mati Jóns einkum að snúast 5 mál: 

1.     Hverjum treystum við best til þess að endureisa stöðugleikann, bæði út frá frá sjónarmiðum almennings og athafnamanna?

2.      Hríðvaxandi ójöfnuð fyrir áhrif skattakerfisins – Endurreisn velferðarkerfisins.

3.      Náttúruverndar- auðlinda og atvinnustefna sem rímar saman.

4.      Stjórnarskrárbreytingar.

5.      Stjórnbætur í lýðræðisátt.  

  Ég hef hér að ofan rakið sjónarmið JBH í eins stuttu máli og ég taldi mér unnt og get tekið undir hvert einasta orð, eins og talað úr mínu hjarta.  Það er engu líkara en JBH hafi gengið í endurnýjun lífdaga og komi nú fram á sjónarsviðið ferskari og sprækari en nokkru sinni fyrr.  

 Jón Baldvin Hannibalsson gagnrýnir einnig stjórnarandstöðuna og sinn flokk, Samfylkinguna og talar um hugsanlega nauðsyn þess að stofna nýjan stjórnmálaflokk og þar fara leiðir okkar að skilja!  Ég get að vísu tekið undir margt af gagnrýni á stjórnarandstöðunna, eins og það að vera alltaf að bregðast sérstaklega við einhverju sem kemur fram í fjölmiðlum og halda sig ekki nógu vel við aðalatriðin og það hefur minn flokkur Samfylkingin ekki gert nógu vel.    

  Eini stjórnmálaflokkurinn sem getur, vill og hefur tekið þessi málefni upp á sína arma, að mínu mati, eru sameinaðir jafnaðarmenn eða Samfylkingin.  Það tókst eftir áratugalangar tilraunir að sameina jafnaðarmenn (kannski ekki alveg alla) í einn flokk sem fékk yfir 30% fylgi í síðustu kosningum og varð þar með einn stærsti jafnaðarmannaflokkur á Norðurlöndum!  Dánárvottorð á flokkinn nú er algerlega ótímabært, þar sem ekki hefur enn verið talið upp úr kjörkössunum!  Þetta ætti JBH að vita manna best verandi karlinn í brúnni til fjölda ára í Alþýðuflokknum og stundum blés harkalega á móti.  Ætlar JBH að sundra jafnaðarmönnum jafnskjótt og þeir hafa náð að sameinast!  Ingibjörg Sólrún sýndi það í borginni að hún getur stjórnað og innann flokksins eru margir mjög hæfir einstaklingar aðrir.  Samfylkingin er frjálslyndur og nútímalegur jafnaðarmannaflokkur.  Við skulum í það minnsta sjá fyrst hvað kemur upp úr kjörkössunum áður en við segjum að honum hafi mistekist.

Sýkna Baugsmanna

Hæstiréttur sýknaði í gær Baugsmenn af ákærunum átta sem eftir stóðu af upphaflegu Baugsákærununum.  Ég hefði satt að segja orðið hissa ef öðruvísi hefði farið.  Allt þetta blessaða mál sem ég og að ég held flestir íslendingar, séu búnir að fá nóg af er löngu orðinn hreinn skrípaleikur af hálfu ákæruvaldsins.

Mál þetta, sama hvað hver segir, hófst að undirlagi Davíðs Oddssonar fyrrverandi forsætisráðherra og tilgangurinn var að brjóta fyrirtækið upp, þarna voru ekki ,,réttir menn" að auðgast.  Kolkrabbinn gamli með Davíð Oddson sem pólitískan leiðtoga, réðist til atlögu við þessa ,,götustráka" eins og Davíð  kallaði Jón Ásgeir á sínum tíma.

Nú er ég hins vegar ekki að verja Baugsmenn sérstaklega, en það hlítur hver skynsamur maður að sjá þetta, ákveðnum valdakjarna í Sjálfstæðisflokknum sveið uppgangur þeirra mjög og nú skyldi látið sverfa til stáls og hverjum öðrum en Haraldi Johannessen var att út á foraðið?!

,,Afrakstur" þessarar herferðar varð enginn, en kostnaðurinn fyrir skattborgara þessa lands líklega hátt í tvo milljarða króna og hugsanlega annað eins áður en yfir líkur, ef Baugsmenn fá skaðabætur frá ríkinu sem ekki er ósennilegt.

Nú er mál að linni og Haraldur Jóhannessen sjái sóma sinn í því að hlífa sér og embættinu við ævarandi niðurlægingu með því að hætta frekari málarekstir gegn Baugsmönnum.  Hann á að mínum dómi að sjá sóma sinn í því að segja af sér.  Ég er viss um að Björn Bjarnason getur fundið eitthvað annað fyrir hann að gera. 

Áfram Hillary!

Ég varð ákaflega glaður þegar ég heyrði að Frú Hillary Clinton ætlaði að sækjast eftir útnefningu demókrata til að verða næsti forseti Bandaríkjanna. 

Framboð hennar vekur manni von í brjósti, um að eftir áralanga setu hins öfgafulla og íhaldssama stríðsforseta George W. Bush, komi frambærilegur forseti. 

Hillary er mjög frambærilegur stjórnmálamaður, eins og kom vel í ljós bæði á meðan hún var forsetafrú í Hvíta húsinu og eins eftir að hún varð öldungardeildarþingmaður fyrir New York.  Áfram Hillary.

Listi Sjálfstæðismanna á Suðurlandi!

Jæja þá er það komið á hreint, sem svo margir hafa verið að bíða eftir, Árni Jonsen verður í 2. sæti á lista Sjálfstæðismanna á Suðurlandi!  Á fundi kjördæmisráðs flokksins á Hótel Örk kom fram breytingartillaga um að Árni Jonsen yrði ekki á listanum en hún var felld.

 Sjálfstæðismenn stóðu frammi fyrir tveimur kostum sem báðir voru slæmir að mínu áliti, annars vegar að hunsa vilja kjósenda í prófkjöri og hins vegar að samþykkja niðurstöðu prófkjörs og hafa Árna í öðru sæti á listanum.

 Ég er hræddur um að margir eigi eftir að hugsa sig tvisar um að kjósa flokkinn í vor, hvort sem þeir búa í Suðurlandskjördæmi eða ekki, þar sem að atkvæði greitt flokknum í Reykjavík eða annars staðar getur þýtt að Árni Jonsen fari inn á þing sem uppbótarþingmaður.

Það er ljóst að Árni hefur nokkuð breiðan stuðning í kjördæminu, ekki bara í Eyjum, sem skýrist væntanlega af því að hann hefur ,,unnið vel fyrir sína menn" komið ýmsum hlutum í verk, útvegað mönnum styrki o.þ.h.

 Það breytir hins vegar ekki því að maðurinn hefur sýnt af sér siðlausa hegðun, hann stal frá þjóðinni og fanst það greinilega ekki vera neitt mál, ,,tæknileg mistök".  Slíkur maður á að mínu viti ekki erindi á Alþingi Íslendinga. 

 

Liverpool sigraði Chelsea!

Fór á Players í hádeginu og horfði á mína menn í Liverpool taka Chelsea í bakaríið 2-0.  Virkilega skemmtilegur leikur, en mörkin skoruðu Dirk Kuyt á 4. mínútu og Jermaine Pennant á 18. nínútu.  Virkilega sætur sigur þar sem að Chelsea komst ekkert áfram gegn sterku liði Liverpool.  Mörkin tvö voru glæsileg sérstaklega síðara markið sem fór í þverslána og inn.  Þá er bara að vona að Arsenal og Man. United geri jaftefli á morgun eða að Arsenal vinni.

Byrgismálið og Framsóknarflokkurinn

     Þetta svokallaða ,,Byrgismál” hefur heldur betur verið að hlaða utan á sig og allt orðir með hreinum ólíkindum ef satt skal segja.  Það er ekki nóg með að allar siðferðisreglur hafi verið brotnar og brotið á trausti skjólstæðinga Byrgisins, heldur er að því er virðist um milljóna tuga fjársvik eða fjárdrátt að ræða. 

Hver er ábyrgð stjónvalda á því að ausa 200 milljónum af fé skattborgarana í slíka starfsemi á 5 ára tímabili og nota bene þrátt fyrir að hin ,,svarta skýrsla ríkisendurskoðunar” hafi litið dagsins ljós árið 2003!  Jú menn vísa hvor á annann.  Núverandi formaður Fjárlaganefndar Alþingis Birkir Jón Jónsson alþingismaður Framsóknarflokksins og  fyrrverandi aðstoðarmaður Félagsmálaráðherra þegar að ,,svarta skýrslan” kom fram vísar ábyrgðinni á Ríkisendurskoðun!   Það er einfaldlega rangt að benda á hana sem sökudólg, ráðherra ber að sjálfsögðu pólitíska og lagalega ábyrgð á þeim fjármunum sem fara frá hinu opinbera og því eftirliti sem fylgja á í kjölfarið.  

Mér hefur reyndar lengi fundist það fáránlegt að trúarsamtök, sumir segja ofsatrúarsamtök séu að að sinna meðferð alkahólista eða fíkniefnaneytenda og nota trúna í því skyni, því menn eru auðvitað í mjög mismunandi ástandi og ekki allir tilbúnir til að taka slíkri ,,meðferð” vel.  Því var ég hjartanlega sammála Þórani Tyrfingssyni yfirlækni á Vogi þegar hann kallaði eftir ábyrgð stjónmálamanna og einkum Framsóknarflokksins hvað þetta varðaði.  Því eins og hann sagði að svo virtist sem stjónmálamenn litu á áfengis og fíkniefnavanda sem synd!  Nú ætti að flytja sjúklinga frá einu trúfélagi til annars.  Þetta er náttúrlega ekki hægt!  

Ég held  að þetta mál ásamt fleirum sé enn einn naglinn í líkkistu Framsóknarflokksins.