Innganga íslendinga í ESB. Stærstu hindruninni rutt úr vegi.

  Í fyrirspurnartíma á morgunverðarfundi á Hótel borg í gær til Micael Köler, ráðgjafa sjávarútvegsstjóra ESB kom fram að alþjóðlegar veiðiheimildir íslendinga yrðu tryggari til lengri tíma ef Ísland gengi í ESB.  Khöler segir að reglan um hlutfallslegan stöðugleika tryggi að íslendingar ákveði sjálfir hverjir veiði í lögsögunni sem aðilar að ESB.  

Reglan um hlutfallslegan stöðugleika felur það í sér að hvert ríki fyrir sig setur skilyrði um hver fái úthlutað kvóta.  Þá þarf samþykki íslendinga ef breyta á reglunni skv. Eiríki Bergmann sérfræðingi í Evrópufræðum. Þá gæti Ísland í aðildarviðræðum farið fram á að fiskimið Íslands  yrðu gerð að sérstöku stjórnsýslusvæði innan sjávarútvegsstefnu ESB og stjórn fiskveiða alfarið haldist í höndum íslendinga.

  Helstu hindruninni fyrir inngöngu í ESB á mati mjög margra virðist þannig vera rutt úr vegi.  Því er ég sannfærðari en nokkru sinni fyrr að við eigum að undirbúa umsókn um aðild að ESB og ganga inn eins fljótt og kostur er.

 

 

 

Ánægjulegur sigur Röskvu. Fyrirboði fyrir vorið!

  Ánægjulegur sigur Röskvu í Háskólakosningunum! Röskva endurheimti meirihluta sinn í Stúdentaráði hlaut 1635 atkvæði og 5 fulltrúa en Vaka hlaut 1615 atkvæði og 4 fulltrúa, munaði sem sagt ekki nema 20 atkvæðum.  Þegar ég var í Háskólanum voru mínir menn í Röskvu ósigrandi og unnu á hverju ári, vökumenn urðu að sama skapi ávallt fyrir miklum vonbrigðum, áttu aldrei möguleika.

  Einn fyrrverandi Röskvumaður, Björn Ingi Hrafnsson, bendir á það í pistli sínum að umhugsunarefni sé hvers vegna dramur margra, þar á meðal minn, um yfirfærslu Röskvu í landsmálin hafi ekki náð að verða að veruleika.  Í Háskólanum hafa vinstrimenn borið gæfu til að vinna mjög vel saman. 

  Vissulega er um fleiri og stærri ágreiningsmál á ræða í landsmálunum en í Háskólapólitíkinni, s.s. afstaðan til einkavæðingar eða framkvæmd hennar, stóriðjumál ofl.  Engu að síður held ég að ,,Röskvumenn" ættu að geta unnið vel saman á landsmálasviðinu og vísa ábyrgðinni á því að svo hafi ekki orðið á Framsóknarmenn, sem hafa verið eins og hundur í bandi íhaldsins í 12 ár, beigt sig og bugtað í hverju málinu á fætur öðru og horfið frá manngildisstefnunni sem ég tel að þeir hafi fylgt á árum áður. 

 Ég hef trú á því að þessar kosningar í Háskólanum nú séu fyrirboði um sigur félagshyggumanna í kosningunum í vor.  Framsóknarflokkurinn hefur hins vegar ákveðið að veðja á áframhaldandi ríkistjórn D og B og líma sig við Sjálfstæðisflokkinn. Þannig að í kosningunum í vor gilda 2 fyrir 1 varðandi þessa flokka, kjósirðu Framsókn færðu Sjálfstæðisflokkinn í ,,kaupbæti" og öfugt, kjósirðu Sjálfstæðisflokkinn færðu Framsókn í ,,kaupbæti"!  Það er algjörlega kristaltært í mínum huga að ef þessir flokkar fá áfram meirihluta þá munu þeir halda áfram að vinna saman, þeir hafa beinlínis sagt það sjálfir!  Ríkistjórnin eru að þrotum kominn að mínu mati og verður að fara frá.

 

 

Röskva hlaut flest atkvæði í kosningum til Stúdentaráðs

Hægri grænir? Vatn á millu stóriðjusinna?

  Framtíðarlandið ákvað að bjóða ekki fram í næstu Alþingiskosningum, sem ég fagna mjög sem meðlimur í þeim samtökum.  Þetta eru þverpólitísk grasrótarsamtök og eiga að vera það áfram.  Ég tel að fleiri framboð til Alþingis séu einfaldlega vatn á millu stóriðjusinna og fylgi við slík framboð myndi fyrst og fremst koma frá þeim sem eru óánægðir með ríksstjórnina og verða vatn á millu hennar, dreifa kröftum okkar sem viljum breytingar.

  Hins vegar er það ekki óhugsandi að ,,Hægri greinir" skipaðir öflugum einstaklingum myndu ná að höggva eittvað í raðir Sjálfstæðismanna, sem vilja stöðva stóriðjustefnuna og eru umhverfisverndarsinnar.  Ég hef vissulega heyrt í fólki sem eru umhverfisverndarsinnar en eru ekki tilbúnir til að kjósa VG eða Samfylkingu.  ,,Hægri grænir" þyrftu því kannski ekki að hafa svo slæm áhrif á hið pólitíska landslag.  Engu að síður hallast ég að því að það verði til hins verra þegar upp verður staðið.

Ómar Ragnarsson telur auknar líkur á framboði umhverfisverndarsinna

Breiðavíkurmálið, skelfilegilegir atburðir.

Skeflilegar upplýsingar hafa verið að koma fram í fjölmiðlum undanfarna daga um uppeldisheimilið í Breiðavík, þar sem misnotkunn barna er sögð hafa farið fram um árabil. 

Ingibjörg Sólrún tók málið upp á Alþingi  og sagði samfélagið eiga þessu fólki skuld að gjalda.  Þar er ég virkilega sammála. Við verðum að bæta þessu fólki þetta upp á einhvern hátt þótt seint sé. Peningar skila fólki að vísu ekki lífshamingunni sem það var rænt en eru kannski smá sárabót.  Við þurfum, eins og ISG sagði ,,að takast á við þennan fortíðardraug".  Þá ræddi ISG einnig um upplýsingar um misnotkun barna í Heyrnleysingjaskólanum í þessu samhengi, sem sló mann einnig mjög.

Það er skelfilegt til þess að vita að msnotkun sem þessi hafi þrifist í skjóli hins opinbera, að eins og ISG sagði ung börn skyldu vera send nánast í útlegð og ,,ofurseld samfélagi ofbeldis og níðingsverka", en heimili þetta var rekið frá árinu 1952 og fram á áttunda áratuginn eins og kom fram hjá Félagsmálaráðherra.

 

Byrjað að undirbúa úttekt á Breiðavíkurmáli í félagsmálaráðuneyti

VG og Samfylking með 45% samanlagt skv. skoðanakönnun Mannlífs

Skoðanakönnunn Mannlífs staðfestir fylgisaukningu VG (22%) og að sama skapi fylgistap Samfylkingarinnar (23%), sem er auðvitað óásættanlegt fyrir hana.  Það er nokkuð ljóst að fylgið er að fara frá Samfylkingu yfir til VG í einhverjum mæli, hver svo sem ástæðan kann að vera.  Hef reyndar mínar hugmyndir um það, sem bíða seinni tíma.

Það sem mér finnst hins vegar athyglisvert við þessa könnun er að Samfylkingin og VG hafa samtals 45% fylgi, sem fær mann til að velta því fyrir sér hvort þessir tveir flokkar gætu hugsanlega náð meirihluta á Alþingi.  Það yrðu merkileg tíðindi.

ps. B 10% D 35%, F 10%

Samfylking í vondum málum? Tek niðurstöðunum með fyrirvara.

Samkvæmt þessari fyrstu skoðanakönnun Blaðsins er Samfylkingin í slæmum málum, frjálslyndir að hverfa, Sjálfstæðisflokkurinn 8% hærri en í síðustu könnun Gallup og VG orðnir stærri en Samfylkingin! Þá heldur ríkisstjórnin velli skv. þessari könnun.

Ef niðurstöðurnar yrðu þessar væru það mikil vonbrigði, en ég hef satt að segja ekki mikla trú á þessarri könnun, of miklar sveiflur miðað við könnun Gallup sem að hefur sýnt sig vera mjög áreiðanleg. Svarhlutfall var að vísu mjög gott eða 88% en 47% eru óákveðnir eða neita að svara.

En Samfylkingin verður að taka undanförnum könnunum sem alvalegri áminningu og grípa til varna. Ég hallast helst að því mikið tal minna manna um upptöku evru og ókosti krónununar (sem ég er alveg sammála) hafi ekki farið vel í þjóðina. En allavega, þá verðum við að kryfja þetta til mergjar.

Samfylkingin með minna fylgi en VG og ríkisstjórnin heldur velli

Burt með okurþjóðfélagið, áfram Jóhanna!

Jóhanna Sigurðardóttir var frábær í Silfrinu á sunnudaginn var og lét höggin dynja á bönkunum og átti ekki í vandræðum með að þagga niður í Jónínu Ben svo eitthvað sé nefnt.  Bankaokrið  sem Jóhanna talaði um er hreint óþolandi, vextir og þjónustugjöld með því hæsta sem gerist á byggðu bóli og vaxtamunurinn heimsmet.  Jóhanna er svo sem ekki að segja neitt nýtt í þessu, hún hefur alltaf veri gagnrýnin á bankana, enda alltaf samkvæm sjálfri sér og fylgin sér.

  En það er ekki bara okur í bankakerfinu, heldur á öllum sviðum þjóðfélagsins, matvælaverð er með því hæsta sem gerist, tryggingar fáránlega háar hérlendis og eldsneytisverð með eina hæstu álagningu sem gerist o.s.frv.  Þessi mál hljóta að verða með stærstu kosningamálunum í vor, þau verða að vera það.  Ég efast um að nokkrar vesturlandaþjóðir aðrar en við myndu sætta sig við þetta.

  Í Fréttablaðinu í dag var sagt frá því að þegar Steve Forbes, ritstjóra FORBES eins virtasta viðskiptablaðs í heimi var sagt frá ástandi efnahagsmála hér á landi, vaxtamuninum og okurvöxtunum, þá skellti hann upp úr! Sagði okkur að reka Seðlabankastjórana og taka upp Evru strax!  Þetta segir manni ýmislegt.

Jóhanna vill að skipuð verði þingnefnd til að rannsaka okur á Íslandi og er ég henni þar hjartanlega sammála.  En til þess að það geti gerst þurfum við að fella núverandi ríkisstjórn og koma Samfylkingunni að.  Hún er eini stjórnmálaflokkurinn sem mögulega getur og vill virkilega gera eitthvað í þessum málum.

 

 

Mildunardómur Hæstaréttar yfir barnaníðingi!

Ég á ekki orð til að lýsa hneykslan minni yfir dómi Hæstaréttar frá sl. föstudegi þar sem hann mildar dóm héraðsdóms yfir Ólafi Barða Kristjánssyni fyrir kynferðisafbrot gegn stúlkubörnum, allt niður í þriggja ára gömlum!  Ég styð því fullkomlega Hrafn Jökulsson ásamt um 200 manns öðrum sem hafa sent mótmæli til réttarins vegna þessa.  Þá fagna ég einnig forsíðu Morgunblaðsins sem birti myndir af dómurunum og lýsti hneykslan sinni á dómnum. 

Vilji almennings er skýr, hann vill þyngja þessa dóma! Vilji löggjafans er einnig greinilega í þyngingarátt, þó að mun betur megi gera.  Refsiramminn er til staðar, því eins og segir í mótmælabréfi Hrafns: ,,Þið hefðuð getað dæmt hann í 4 ára fangelsi, samkvæmt 2. málsgrein 202. greinar almennra hegningarlaga.  Fyrsta málsgreinin gerir ráð fyrir allt að 12 ára fangelsi..".

Dómurinn var kveðinn upp af 5 karldómurum.  Spurning hvort að kvenndómari hefði dæmt öðruvísi, ég hallast að því að að trúa að svo hefði verið.  Við verðum að þyngja dóma yfir kynferðisafbrotamönnum!  

Eldmessa Jóns Baldvins og Samfylkingin

   Jón Baldvin Hannibalsson var í Silfri Egils sl. sunnudag og fór mikinn.  Þar flutti hann mikla ,,eldmessu” um stjórnmála og efnahagsástandið hér á landi.  Jón fór hreinlega á kostum og hef ég ekki í annan tíma heyrt jafn hnitmiðaða gagnrýni og greiningu á stöðu mála.  

  Í sem stystu máli fjallaði Jón um okurþjóðfélagið Ísland, sem hann kallaði hina nýju birtingarmynd hins nýríka samfélags.  Hann fjallaði um verðtryggingarkrónuna, sem hann og Guðmundur Ólafsson hagfræðingur og háskólaprófessor eru sammála um að sé í raun ónýtur gjaldmiðill.  Þá talaði hann um okurvextina og ofurtollana, sem eru nú kapítali út af fyrir sig. Þá væri ,,vinnuþrælkunin” hér á landi orðin fáránleg eða 53 st. á viku að meðaltali! Hvers konar lífsgæði eru það spurði Jón. ,,Við erum að verða skrípamynd af bandarískum kapítalisma” sagði Jón og þar með að fjarlægjast Evrópu hvað þetta varðar. Þá talaði Jón um vaxtamunin hér á landi, sem áðurnefndur Guðmundur Ólafsson og Þorvaldur Gylfason prófessor hafa gert úttekt á og komist að þeirri niðurstöðu að vaxtamunurinn hér á landi sé hreint heimsmet og hvergi annars staðar neitt í líkingu við það sem hér gerist.   

  Jón Baldvin fullyrti að ríkisstjórn Sjálfstæðis og Framsóknarflokks hefðu gert stórkostleg hagstjórnarmistök og í raun hefði engin hagstjórn átt sér stað hér síðustu ár og vitnaði í því sambandi í einn helsta ,,gúrú” viðreisnarstjórnarinnar gömlu, Jónas Haralds.  Jón rökstuddi mál sitt með því að benda á þrjú atriði sem þarna skiptu mestu: 

1.   Ríksstjórnin réðst í gífurlegar stóriðjuframkvæmdir (álframkvæmdir) og virkjanir sem       fjármagnaðar voru með erlendu fé.

2.   Ríkisstjórnin ákvað á sama tíma að veita fólki 90% lán til íbúðarkaupa, sem hleypti           byggingamarkaðnum í algert uppnám.

3.   Slaki í ríkisfjámálum.   

  Þetta þrennt var gert í hagkerfi sem var við fulla framleiðslugetu og fulla atvinnu!  Innflutt vinnuafl bjargaði hins vegar því sem bjargað var, án þess hefði allt farið í kalda kol.   

  Afleiðing þessarra hagstjórnarmistaka urðu síðan þær að krónan styrktist óeðlilega mikið en veiktist síðan þegar erlendar fjármálastofnanir áttuðu sig á því að þetta byggðist allt á erlendu fjármagni og verðbólgan fór af stað í kjölfarið og er að kosta venjulegar fjölskyldur í landinu gífulega mikið, sem þær sitja margar hverjar uppi með í 30 ár eða svo í formi íbúðarlána.  Staðreyndirnar eru síðan þær að við sitjum uppi sem skuldugasta þjóðfélagið og heimilin skuldugustu heimili í heimi.   

 Endureisnin að mati Jóns á að felast í skynsamlegri hagstjórn, aðhaldssamri stórn efnahagsmála í gegnum ríkisfjármálin og frestun á frekari stóriðjuframkvæmdum en þetta tvennt fer saman. Alþingiskosningarnar í vor eiga að mati Jóns einkum að snúast 5 mál: 

1.     Hverjum treystum við best til þess að endureisa stöðugleikann, bæði út frá frá sjónarmiðum almennings og athafnamanna?

2.      Hríðvaxandi ójöfnuð fyrir áhrif skattakerfisins – Endurreisn velferðarkerfisins.

3.      Náttúruverndar- auðlinda og atvinnustefna sem rímar saman.

4.      Stjórnarskrárbreytingar.

5.      Stjórnbætur í lýðræðisátt.  

  Ég hef hér að ofan rakið sjónarmið JBH í eins stuttu máli og ég taldi mér unnt og get tekið undir hvert einasta orð, eins og talað úr mínu hjarta.  Það er engu líkara en JBH hafi gengið í endurnýjun lífdaga og komi nú fram á sjónarsviðið ferskari og sprækari en nokkru sinni fyrr.  

 Jón Baldvin Hannibalsson gagnrýnir einnig stjórnarandstöðuna og sinn flokk, Samfylkinguna og talar um hugsanlega nauðsyn þess að stofna nýjan stjórnmálaflokk og þar fara leiðir okkar að skilja!  Ég get að vísu tekið undir margt af gagnrýni á stjórnarandstöðunna, eins og það að vera alltaf að bregðast sérstaklega við einhverju sem kemur fram í fjölmiðlum og halda sig ekki nógu vel við aðalatriðin og það hefur minn flokkur Samfylkingin ekki gert nógu vel.    

  Eini stjórnmálaflokkurinn sem getur, vill og hefur tekið þessi málefni upp á sína arma, að mínu mati, eru sameinaðir jafnaðarmenn eða Samfylkingin.  Það tókst eftir áratugalangar tilraunir að sameina jafnaðarmenn (kannski ekki alveg alla) í einn flokk sem fékk yfir 30% fylgi í síðustu kosningum og varð þar með einn stærsti jafnaðarmannaflokkur á Norðurlöndum!  Dánárvottorð á flokkinn nú er algerlega ótímabært, þar sem ekki hefur enn verið talið upp úr kjörkössunum!  Þetta ætti JBH að vita manna best verandi karlinn í brúnni til fjölda ára í Alþýðuflokknum og stundum blés harkalega á móti.  Ætlar JBH að sundra jafnaðarmönnum jafnskjótt og þeir hafa náð að sameinast!  Ingibjörg Sólrún sýndi það í borginni að hún getur stjórnað og innann flokksins eru margir mjög hæfir einstaklingar aðrir.  Samfylkingin er frjálslyndur og nútímalegur jafnaðarmannaflokkur.  Við skulum í það minnsta sjá fyrst hvað kemur upp úr kjörkössunum áður en við segjum að honum hafi mistekist.

Sýkna Baugsmanna

Hæstiréttur sýknaði í gær Baugsmenn af ákærunum átta sem eftir stóðu af upphaflegu Baugsákærununum.  Ég hefði satt að segja orðið hissa ef öðruvísi hefði farið.  Allt þetta blessaða mál sem ég og að ég held flestir íslendingar, séu búnir að fá nóg af er löngu orðinn hreinn skrípaleikur af hálfu ákæruvaldsins.

Mál þetta, sama hvað hver segir, hófst að undirlagi Davíðs Oddssonar fyrrverandi forsætisráðherra og tilgangurinn var að brjóta fyrirtækið upp, þarna voru ekki ,,réttir menn" að auðgast.  Kolkrabbinn gamli með Davíð Oddson sem pólitískan leiðtoga, réðist til atlögu við þessa ,,götustráka" eins og Davíð  kallaði Jón Ásgeir á sínum tíma.

Nú er ég hins vegar ekki að verja Baugsmenn sérstaklega, en það hlítur hver skynsamur maður að sjá þetta, ákveðnum valdakjarna í Sjálfstæðisflokknum sveið uppgangur þeirra mjög og nú skyldi látið sverfa til stáls og hverjum öðrum en Haraldi Johannessen var att út á foraðið?!

,,Afrakstur" þessarar herferðar varð enginn, en kostnaðurinn fyrir skattborgara þessa lands líklega hátt í tvo milljarða króna og hugsanlega annað eins áður en yfir líkur, ef Baugsmenn fá skaðabætur frá ríkinu sem ekki er ósennilegt.

Nú er mál að linni og Haraldur Jóhannessen sjái sóma sinn í því að hlífa sér og embættinu við ævarandi niðurlægingu með því að hætta frekari málarekstir gegn Baugsmönnum.  Hann á að mínum dómi að sjá sóma sinn í því að segja af sér.  Ég er viss um að Björn Bjarnason getur fundið eitthvað annað fyrir hann að gera.